રાણપુરમાં 112 જીવિત મતદારોને નામ કમીની નોટિસ | Ranpur Voter List
બોટાદના રાણપુરમાં મતદાર યાદી સુધારણામાં મોટી બેદરકારી! ૧૧૨ જીવિત નાગરિકોને નામ કમી કરવાની નોટિસ અપાતા હોબાળો. જાણો શું છે સમગ્ર મામલો અને લોકોની માગ.
બોટાદ: બોટાદ જિલ્લાના રાણપુર શહેરમાં મતદાર યાદી સુધારણાની પ્રક્રિયા દરમિયાન વહીવટી તંત્રની ગંભીર બેદરકારી સામે આવતા સ્થાનિકોમાં રોષ વ્યાપ્યો છે. શહેરના અંદાજે 112 જેટલા જાગૃત અને જીવિત નાગરિકોને તેમનું નામ મતદાર યાદીમાંથી કમી કરવા માટે ‘ફોર્મ નંબર 7’ હેઠળ નોટિસ ફટકારવામાં આવી છે, જેના કારણે ભારે હોબાળો મચી ગયો છે.
શું છે સમગ્ર મામલો?
સામાન્ય રીતે ફોર્મ નંબર 7 ત્યારે ભરવામાં આવે છે જ્યારે કોઈ મતદારનું મૃત્યુ થયું હોય અથવા તે તે વિસ્તાર છોડીને કાયમી ધોરણે અન્યત્ર જતો રહ્યો હોય. પરંતુ રાણપુરમાં આશ્ચર્યજનક રીતે જે લોકો નિયમિત મતદાન કરે છે અને વર્ષોથી ત્યાં જ વસવાટ કરે છે, તેમને જ ‘મૃત’ અથવા ‘સ્થળાંતરિત’ ગણીને નોટિસ આપવામાં આવી છે.
નાગરિકોનો ઉગ્ર વિરોધ
આ ભૂલ સામે આવતા જ અસરગ્રસ્ત નાગરિકોમાં ભારે આક્રોશ જોવા મળ્યો હતો. મોટી સંખ્યામાં એકઠા થયેલા લોકોએ મામલતદાર કચેરીએ પહોંચી લેખિત રજૂઆત કરી હતી. સ્થાનિકોનો આક્ષેપ છે કે આ કોઈ ટેકનિકલ ભૂલ નથી પણ જાણીજોઈને કરવામાં આવેલી ગેરરીતિ હોઈ શકે છે. નાગરિકોએ માગ કરી છે કે આ મામલે તટસ્થ તપાસ કરવામાં આવે અને જે પણ અધિકારી કે કર્મચારી આ કાર્ય માટે જવાબદાર હોય તેમની સામે કડક પગલાં લેવામાં આવે. સાથે જ, જે 112 લોકોના નામ કાઢવાની પ્રક્રિયા હાથ ધરાઈ છે, તેમના નામ યાદીમાં યથાવત રાખવાની ખાતરી માગી છે. જો યોગ્ય ન્યાય નહીં મળે તો આગામી દિવસોમાં ઉગ્ર આંદોલન કરવાની ચીમકી પણ ઉચ્ચારવામાં આવી છે.
ડોલર vs રુપિયા : શું ફરક પડી શકે સાધારણ વ્યક્તિ ના જીવન ઉપર
ગુજરાતી ગળી કઢી બનાવવા ની Recipe
વઢવાણ: સાંકળી ગામે ઉપસરપંચના ત્રાસથી યુવાન જયેશભાઈ મેણીયાએ આત્મહત્યા કરી
